凍天暖身首選！當然是食返個熱辣辣的煲仔飯暖笠笠！但出面的素食煲仔飯選擇少，仲經常遇到北菇發酸的問題，與其將就，不如自己動手，全程只需15分鐘就有得食，仲快過單純煮白飯，超適合一人獨食或兩口子分享。

今次就特意將甜梅菜加入煲仔飯，成為呢款「三菇梅菜素食煲仔飯」！所謂「三菇」，就是大啡菇、調味猴頭菇同牛肝菌，集牛肝菌的濃香、猴頭菇的肉質口感，再加埋大啡菇的鮮甜；配埋甜梅菜與素咸魚提味，鹹香惹味，每粒米都吸飽醬汁，輕輕鬆鬆可以多添幾碗飯！

材料︰
調味猴頭菇適量、牛肝菌適量、大啡菇1只、素鹹魚3件、梅菜 1棵、白米1.5量杯、牛肝菌水1.25量杯、姜米 1湯匙、芫茜適量

梅菜調味料︰
八角1粒、素蠔油1.5湯匙、冰糖半茶匙、胡椒粉少許、味醂半茶匙、麻油少許

甜豉油製法︰
生抽 3茶匙、糖 2茶匙、味醂 1茶匙、菇粉少許、麻油 少許

做法︰

Step 1.先將白米洗淨，浸1小時，梅菜洗淨，泡水 15 分鐘去沙，瀝水切粒備用；梅菜粒白鑊炒乾，下八角及冰糖略炒，加入素蠔油，生抽及胡椒粉調味，備用。

Step 2.牛肝菌沖洗乾淨，浸軟切小塊，菇水留起備用，大啡菇切件。

Step 3.把牛肝菌水煮至滾起，然後下米，調較為小火，開蓋煮1-2分鐘，期間需要用筷子攪拌。

Step 4.待水揮發了一半後，下牛肝菌拌勻；然後下調味猴頭菇、大啡菇、素咸魚及梅菜舖面，加蓋以小火煮5分鐘。

Step 5.想有飯焦的話，可以開蓋沿煲邊加少許油，然後把煲傾斜四側燒30秒，形成飯焦的效果。

Step 6.最後灑上芫茜及薑米，把甜鼓油煮滾，淋上面即成。

作者：素食KOL 邱蓮達

佛教徒及持素15年，從事市場及公關工作，鍾意捐窿捐罅搵素食，探訪小店，推廣香港本事文化，愛好美食攝影，專欄作家。